Яамны үүрэг, хариуцлагын ерөнхий хуваарь
Батлан хамгаалах яам нь Засгийн газрын үйл ажиллагааны стратегийг хэрэгжүүлэх үүрэг, хариуцлага хүлээж, сайд, Засгийн газрын танхимд бүх талын мэргэжлийн зөвлөгөө, дэмжлэг үзүүлнэ. Яам нь батлан хамгаалах стратегийн бодлого, төлөвлөлтийг боловсруулах, удирдамжаар хангах, хууль, эрх зүйн хэрэгжилтийг зохицуулах, төрийн захиргаа, орон нутгийн хамгаалалт, улсын дайчилгааны удирдлага, төлөвлөлтийг зохицуулалтаар хангах, батлан хамгаалах бодлогын хэрэгжилтийг зохицуулах, бодлогын хэрэгжилтэд хяналт-шинжилгээ, аудит хийх, үр дүнд нь үнэлгээ өгөх, гадаад хамтын ажиллагааг өргөжүүлэн хөгжүүлэх, улсын агаарын хөлөг эзэмшигч байгууллагуудын хуульд заасан харилцааг зохицуулах, төсөв, хөрөнгө оруулалтын бодлого, зарцуулалтын тэнцвэр, харилцан уялдаа холбоог удирдлагаар хангах асуудалд өргөн хүрээтэй хандаж, зохистой, оновчтой удирдана. Батлан хамгаалах яам нь чиглэлийн яам байж, Засгийн газрын батлан хамгаалахын зөвлөхийн үүрэг, хариуцлагыг хүлээнэ.
Батлан хамгаалах яамны үйл ажиллагааны стратеги болон зохион байгуулалтын бүтцийн ерөнхий тогтолцооны загварыг үндэслэн тус яамны зохион байгуулалтын бүтцийн нэгж, тэдгээрийн үндсэн үүрэг, чиг үүргийг дор дурдсанаар тодорхойлж байна:
1.Стратегийн бодлого, төлөвлөлт хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь яамны үйл ажиллагааны стратегийн 1 дүгээр зорилтын хүрээнд Монгол Улсын батлан хамгаалах бодлогын хэрэгжилтийг хангаж, Зэвсэгт хүчнийг хөгжүүлэх стратегийн бодлого, төлөвлөлтийн баримт бичиг, хууль тогтоомжийн төсөл боловсруулах, бодлогын нэгдсэн удирдлага, удирдамжаар хангах үндсэн үүрэг хүлээнэ.
Энэ хүрээнд батлан хамгаалах бодлого, хууль, эрх зүйн хэм хэмжээний цогц байдал, түүний хэрэгжилтийн уялдаа холбоог хангах, стратегийн төлөвлөлтийн баримт бичгийн төсөл боловсруулах, Монгол Улсын батлан хамгаалах бодлогод тусгагдсан чиглэлүүд, Үндэсний аюулгүй байдлын зөвлөл, Засгийн газрын бодлого, шийдвэрийн хэрэгжилтийг зохион байгуулах удирдамжаар хангах, төрийн бодлого, хууль тогтоомжийн боловсруулалтад батлан хамгаалах эрх ашигт нийцсэн санал, дүгнэлтийг тусгуулах, Зэвсэгт хүчнийг хөгжүүлэх бодлого, төлөвлөлтийн баримт бичгийг боловсруулж, хэрэгжилтийг удирдлагаар хангах, энхийг дэмжих ажиллагаанд оролцох асуудлаар бодлого боловсруулж, эрх бүхий байгууллагаар шийдвэрлүүлж, хэрэгжилтийг зохион байгуулах, цэргийн шинжлэх ухаан, инновацын бодлогын хэрэгжилтийг зохион байгуулах, батлан хамгаалах боловсролын үндсэн чиглэлийг тодорхойлон хөгжүүлж, бүх нийтийн үйл хэрэг болгох, удирдамжаар хангах чиг үүргийг хэрэгжүүлнэ.
Энэ нэгжийн чиг үүргийн хүрээнд бодлого, төлөвлөлтийн нэгж ажиллана.
Тус нэгжийн үйл ажиллагаа нь Монгол Улсын батлан хамгаалах тогтолцоог бэхжүүлэх, стратегийн бодлого, төлөвлөлтийг хэрэгжүүлэх, хууль, эрх зүйн хэм хэмжээний цогц байдлыг хангах, Зэвсэгт хүчний шинэчлэл, цаашдын хөгжлийн чиг хандлагыг төлөвлөх, мэргэжлийн цэрэгт суурилсан, чадварлаг болгон хөгжүүлэхэд чиглэсэн хөтөлбөр, төсөл боловсруулах, Зэвсэгт хүчнийг энхийг дэмжих ажиллагаанд оролцуулах бодлого, чиглэлийг боловсруулах, батлан хамгаалах аж үйлдвэрлэлийг өргөжүүлэх, олон улсын болон бүс нутгийн аюулгүй байдлын хандлагад дүн шинжилгээ хийх, шинжлэх ухааны ололт, инновацын бодлого, чиглэлийг хөгжүүлэх, батлан хамгаалах боловсролыг хөгжүүлэхэд чиглэгдэнэ. Мөн сайд, Засгийн газрын танхимын үйл ажиллагааны үр нөлөө, үр ашгийг дээшлүүлэхэд чиглэж, сайдыг улс орныг батлан хамгаалах асуудлаар мэдээлэл, санал, зөвлөмжөөр хангаж, шийдвэр гаргах механизмд дэмжлэг үзүүлэх, мэргэшлийн зөвлөгөө, цаг үеэ олсон шуурхай мэдээлэл, үйлчилгээ, бүх талын дэмжлэгээр хангах замаар хэрэгжинэ.
Энэ нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь бусад яам, Засгийн газрын тохируулагч, хэрэгжүүлэгч агентлаг, төрлийн цэргийн командлал, удирдах байгууллага, нутгийн захиргааны байгууллага, түүний батлан хамгаалах асуудал хариуцсан нэгж, албан тушаалтан, эрдэм шинжилгээ, судалгаа, хэвлэл мэдээлэл, батлан хамгаалах төрийн өмчит үйлдвэрийн газар, төрийн бус байгууллага, иргэд байна. Энэ үйлчилгээг үзүүлэхэд оролцох гол түнш нь Ерөнхийлөгчийн Тамгын газар, Засгийн газрын Хэрэг эрхлэх газар, Гадаад харилцааны яам, Хууль зүй, дотоод хэргийн яам, Сангийн яам, Гэр бүл, хөдөлмөр, нийгмийн хамгааллын яам, Байгаль орчин, уур амьсгалын өөрчлөлтийн яам, Боловсролын яам, аймаг, нийслэлийн Засаг дарга, тэдгээрийн Тамгын газар, эрдэм шинжилгээ, судалгааны байгууллагууд байна.
2.Төрийн захиргааны удирдлагын асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь яамны үйл ажиллагааны стратегийн 2 дугаар зорилтын хүрээнд төрийн захиргааны удирдлагын манлайллыг хэрэгжүүлэх, батлан хамгаалахын хүний нөөцийн бодлогын хэрэгжилтийг хангах, нийгмийн хамгааллын бодлого, төлөвлөлтийг боловсронгуй болгох, хүүхэд, залуучуудад эх оронч үзэл төлөвшүүлэх бодлого, хөтөлбөрийг хэрэгжүүлэх, удирдамжаар хангах үндсэн үүрэг хүлээнэ.
Энэ хүрээнд төрийн захиргааны удирдлагын манлайллыг хангах, яамны хөдөлмөрийн дотоод үйл ажиллагааг зохицуулах, батлан хамгаалах хууль, тогтоомж, Зэвсэгт хүчний үйл ажиллагааг сурталчлах, иргэн-цэргийн харилцааг бэхжүүлэх, мэдээллийн аюулгүй байдлын үйл ажиллагааг удирдамжаар хангах, батлан хамгаалахын хүний нөөцийн бодлогын баримт бичгийг төгөлдөржүүлэх, нийгмийн хамгааллын бодлого, төлөвлөгөө боловсруулах, хүүхэд, залуучуудад эх оронч үзэл төлөвшүүлэх бодлого, хөтөлбөрийн хэрэгжилтийг зохион байгуулах, удирдамжаар хангах, төрийн болон албаны нууцын хадгалалт, хамгаалалтыг зохион байгуулах, хяналт тавих, удирдамжаар хангах чиг үүргийг хэрэгжүүлнэ.
Энэ нэгжийн чиг үүргийн хүрээнд хуулийн нэгж ажиллана.
Энэ нэгжийн үйл ажиллагаа нь яамны үйл ажиллагааны төлөвлөгөөг боловсруулах, зохицуулах, хүний нөөцийн хөгжлийн хөтөлбөр, төсөл, урт хугацааны төлөвлөгөө боловсруулах, бодлогыг төлөвлөх, хэрэгжилтийг зохион байгуулж хангах, гадаад, дотоодын цэргийн сургуулиудад хүний нөөцийг бэлтгэх бодлогыг зохицуулан хэрэгжүүлэх, батлан хамгаалах салбарт ажиллагсдын нийгмийн хамгааллын баталгааг сайжруулах хөтөлбөр, төслийг боловсронгуй болгох, батлан хамгаалах үйл ажиллагаанд орчин үеийн мэдээллийн дэвшилтэт технологийг нэвтрүүлэн ашиглах, мэдээллийн аюулгүй байдлыг хангах, холбогдох цахим санг байгуулж, үйл ажиллагаанд ашиглах, мэдээллийн техник, хэрэгслийн ашиглалтад хяналт тавьж, сүлжээний найдвартай ажиллагааг зохион байгуулах, батлан хамгаалах бодлого, хууль тогтоомж, Зэвсэгт хүчний үйл ажилалгааг сурталчлах, иргэн-цэргийн харилцааг бэхжүүлэх, хүүхэд, залуучуудад эх оронч үзэл төлөвшүүлэх, иргэд, цэргийн алба хаагчид, бэлтгэл болон чөлөөнд байгаа ахмадуудад үзүүлэх мэдээлэл, үйлчилгээний ажлыг бодлогын удирдамжаар хангах, архив, албан хэрэг хөтлөлтийн стандартыг мөрдүүлж, хэрэгжүүлэхэд чиглэгдэнэ.
Энэ нэгжээс үзүүлэх үйл ажиллагаа нь чадварлаг төрийн албан хаагч бүхий төрийн захиргааны мэргэшсэн, цомхон бүтцээр яамны тасралтгүй, хэвийн жигд ажиллагааг хангахад чиглэнэ. Мөн сайд болон яамны аппаратад шийдвэр боловсруулан гаргах, хэрэгжүүлэхэд үйлчилгээ үзүүлэх, шаардлагатай мэдээлэл, зөвлөгөө, дэмжлэгээр хангах, удирдлагын соёл, чадавхыг дээшлүүлэх, тэргүүний арга барил, туршлагыг нэвтрүүлэх, алба хаагчдыг сургаж хөгжүүлэх, тэдний үйл ажиллагаа, мэргэшлийн түвшинг нь үнэлж, дүгнэх, ажиллагсдын ажиллах нөхцөл, нийгмийн баталгааг хангах замаар хэрэгжинэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд, төрийн захиргааны албан хаагчид байх бөгөөд шууд бус хэрэглэгч нь Засгийн газрын тохируулагч болон хэрэгжүүлэгч агентлаг, төрлийн цэргийн командлал, удирдах газар, Зэвсэгт хүчний нэгтгэл, анги, байгууллагууд, нутгийн захиргааны байгууллага, төрийн холбогдох бусад байгууллага, иргэд, бусад хэрэглэгч байна.
Энэ үйлчилгээг үзүүлэхэд оролцох гол түнш нь Хууль зүй, дотоод хэргийн яам, Гэр бүл, хөдөлмөр, нийгмийн хамгааллын яам, Сангийн яам, Боловсролын яам, Соёл, спорт, аялал жуулчлал, залуучуудын яам, Цахим хөгжил, инноваци, харилцаа холбооны яам, Төрийн албаны зөвлөл, боловсрол, сургалтын болон эрдэм шинжилгээний байгууллагууд байна.
3.Орон нутгийн хамгаалалт, дайчилгааны асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг:
Энэ нэгж нь яамны үйл ажиллагааны стратегийн 3 дугаар зорилтын хүрээнд орон нутгийн хамгаалалтыг бэхжүүлэх, улсын дайчилгааны нэгдмэл удирдлага, төлөвлөлтийг боловсронгуй болгож, хэрэгжилтийг хангах үндсэн үүрэг хүлээнэ.
Энэ нэгжийн үйл ажиллагаа нь орон нутгийн хамгаалалтын тогтолцоог бэхжүүлэхэд чиглэсэн олон талт арга хэмжээг бодлогын удирдамжаар хангаж, зохион байгуулах, улсын дайчилгааны нэгдмэл удирдлага, төлөвлөлтийг боловсронгуй болгох, түүнийг хэрэгжүүлэх бэлтгэлийг хангах, улс орныг дайны байдалд шилжүүлэх ерөнхий төлөвлөлтийг боловсронгуй болгох, түүнийг хэрэгжүүлэх бэлтгэлийг хангах, аймаг, нийслэл (дүүрэг)-ийн Засаг даргын Тамгын газрын Цэргийн штабын үйл ажиллагааг бодлого, төлөвлөлт, захиргааны удирдлагаар хангах, орон нутгийн хамгаалалт болон дайчилгааны нөөцийн бүрдүүлэлтэд хяналт тавьж, мэдээллийн нэгдсэн санг байгуулах чиг үүргийг хэрэгжүүлнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь бусад яам, Засгийн газрын тохируулагч, хэрэгжүүлэгч агентлаг, төрлийн цэргийн командлал, удирдах газар, Зэвсэгт хүчний нэгтгэл, анги, салбарууд, нутгийн захиргааны байгууллага, төрийн болон төрийн бус байгууллага, аж ахуй нэгж, албан тушаалтан, иргэд байна.
Энэ үйлчилгээг үзүүлэхэд оролцох гол түнш нь Монгол Улсын Ерөнхийлөгчийн Тамгын газар, Засгийн газрын Хэрэг эрхлэх газар, төрийн захиргааны төв болон нутгийн захиргааны байгууллага, агентлагууд, аймаг, нийслэл (дүүрэг)-ийн Засаг дарга, тэдгээрийн Тамгын газар, түүний Цэргийн штаб байна.
4.Бодлогын хэрэгжилтийг зохицуулах асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь яамны үйл ажиллагааны стратегийн 4 дүгээр зорилтын хүрээнд батлан хамгаалах хууль тогтоомж, бодлогын хэрэгжилтийг зохион байгуулах, зэвсэглэл, техник, материал хэрэгсэл болон батлан хамгаалах материаллаг нөөцийг шинэчлэх, бүрдүүлэх, хадгалах, хангах ажлыг зохицуулах үндсэн үүрэг хүлээнэ.
Энэ хүрээнд батлан хамгаалах хууль тогтоомж, бодлого, төсөл, хөтөлбөрийн хэрэгжилтийг зохион байгуулах, Зэвсэгт хүчний зэвсэг, техникийг шинэчлэх, сэргээн сайжруулах бодлогын хэрэгжилтийг зохицуулах, материал, хэрэгслийн хангалт, стандарт хэмжил зүйн бодлого, бүтээн байгуулалтын болон батлан хамгаалах салбарт ажиллагсдад чиглэсэн нийгмийн хамгааллын төсөл хөтөлбөрийн хэрэгжилтийг зохицуулах, агаарын бохирдлын эсрэг үйл ажиллагааг хэрэгжүүлэх хүрээнд “Тэрбум мод” үндэсний хөдөлгөөнийг салбарын хэмжээнд зохион байгуулах чиг үүрэг хэрэгжүүлнэ.
Энэ нэгжийн зарим чиг үүргийн хүрээнд материал, техникийн хангамжийн нэгж ажиллана.
Энэ нэгжийн үйл ажиллагаа нь батлан хамгаалах бодлогын хэрэгжилтийг зохион байгуулж, цэргийн байгуулалтыг хөгжүүлэх хөтөлбөр, төслийн хэрэгжилтийг зохицуулах, төрийн өмчийн төлөөллийг хэрэгжүүлэх, зэвсэглэл, техник, материал, хэрэгслийг шинэчлэх, хадгалалт, хамгаалалтыг сайжруулах төсөл, хөтөлбөр боловсруулах, зэвсэглэл, техникийг шинэчлэхтэй холбоотой техник-эдийн засгийн үндэслэл, нөөцийг бүрдүүлж, хэрэгжилтийг зохицуулах, цэргийн болон цэрэг-техникийн хамтын ажиллагаатай орнуудаас үзүүлж буй тусламжийн бараа, материалыг хүлээн авах, батлан хамгаалах салбарын төрийн өмчийн асуудлаар эрх зүй, техник-эдийн засгийн үндэслэлийг боловсруулан илүүдэлтэй болон үндсэн хөрөнгийн данснаас хасагдсан зэвсэглэл, техник, эд хөрөнгийг худалдан борлуулах замаар хөрөнгө төвлөрүүлэх ажлыг зохион байгуулах, салбарын бүтээн байгуулалтын үр ашгийг дээшлүүлэх, алба хаагчдын нийгмийн хамгааллын бодлогын хэрэгжилтийг зохицуулах арга хэмжээ авах зэрэгт чиглэгдэнэ. Мөн сайдад мэргэшлийн зөвлөгөө өгөх замаар батлан хамгаалах бодлогын хэрэгжилтийг зохицуулах, зэвсэглэл, техник, материал, хэрэгслийн нөөц, төсвийн тэнцвэрт байдлыг хангахад чиглэнэ. Энэ нь нөөцийг оновчтой хуваарилах замаар бодлого хэрэгжүүлэхэд оролцож байгаа бүх байгууллагатай түншийн харилцаа тогтоож, тэдний үйл ажиллагааг бодлого, төлөвлөгөө, хөтөлбөрийг хэрэгжүүлэхэд чиглүүлэн зохион байгуулах, зохицуулах замаар хэрэгжинэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд, Засгийн газрын тохируулагч болон хэрэгжүүлэгч агентлаг, харьяа байгууллагууд байх бөгөөд шууд бус хэрэглэгч нь бусад яам, олон нийт, төрлийн цэргийн командлал, Зэвсэгт хүчний нэгтгэл, анги, байгууллага, төрийн өмчит үйлдвэр, аж ахуйн нэгж байна. Энэ үйлчилгээг үзүүлэхэд оролцох гол түнш нь Сангийн яам, холбогдох бусад яам, агентлаг, Төрийн өмчийн бодлого, зохицуулалтын газар байна.
5.Хяналт-шинжилгээ, үнэлгээ, дотоод аудитын асуудал хариуцсан зохион байгуулалтын нэгж, түүний үндсэн үүрэг, чиг үүрэг
Энэ нэгж нь үйл ажиллагааны стратегийн 5 дугаар зорилтын хүрээнд батлан хамгаалах салбарын үйл ажиллагаанд хяналт-шинжилгээ, үнэлгээ хийж, эрсдэлийг тооцох, хараат бус дотоод аудит явуулах, хэрэглэгчдийг мэдээллээр хангах үндсэн үүрэг хүлээнэ.
Энэ хүрээнд батлан хамгаалах бодлого, үйл ажиллагааны хэрэгжилтийн явц, үр дүн, сайдын эрхлэх асуудлын хүрээний агентлаг, аж ахуйн нэгж, байгууллагын үйл ажиллагаанд хяналт-шинжилгээ, үнэлгээ хийх, улсын болон салбарын хөтөлбөр, төслүүдийн төлөвлөлт, хэрэгжилтэд хяналт-шинжилгээ хийх, үнэлэлт, дүгнэлт өгөх, биелэлтийг хангахад дэмжлэг үзүүлэх, төсөв, санхүүгийн хууль тогтоомжийн хэрэгжилт, салбарын төсвийн төлөвлөлт, зарцуулалт, санхүүгийн үйл ажиллагаанд дотоод аудит, хяналт шалгалт хийх, үнэлэлт, дүгнэлт өгөх, төсөв, санхүүгийн үйл ажиллагааг сайжруулах зөвлөмж гаргах, эрсдэлийн удирдлагаар хангах чиг үүрэг хэрэгжүүлнэ.
Энэ нэгжийн зарим чиг үүргийн хүрээнд хяналт шалгалтын нэгж ажиллана.
Энэ нэгжийн үйл ажиллагаа нь батлан хамгаалах бодлогын хэрэгжилтийн явцад хяналт-шинжилгээ хийж, үр дүнд үнэлгээ өгч бодлогын үр дүнг сайжруулах, салбарын хэмжээний дотоод аудитын хяналтыг хэрэгжүүлж төсөв, санхүүгийн үр ашгийг нэмэгдүүлэх, хяналт-шинжилгээ, үнэлгээ, аудитын дүгнэлт зөвлөмж гаргах замаар яамнаас хэрэгжүүлж байгаа бодлого, үйл ажиллагааны үр ашгийг нэмэгдүүлэх, эрсдэлээс урьдчилан сэргийлэх, байгууллагын үнэ цэнэ, үйл ажиллагааны үр дүнд ахиц гаргахад дэмжлэг үзүүлэхэд чиглэгдэнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, батлан хамгаалахын ерөнхий хянан шалгагч, зохион байгуулалтын бүтцийн бусад нэгжүүд, Засгийн газрын холбогдох агентлаг байх бөгөөд шууд бус хэрэглэгч нь Төрлийн цэргийн командлал, Зэвсэгт хүчний нэгтгэл, анги, байгууллага, бусад хэрэглэгч байна. Энэ үйлчилгээг үзүүлэхэд оролцогч гол түнш нь Засгийн газрын Хэрэг эрхлэх газар, Засгийн газрын Хяналт хэрэгжүүлэх газар, Үндэсний статистикийн хороо, аудитын байгууллага, эрдэм шинжилгээний байгууллага болон тооцоолох төвүүд байна.
6.Гадаад хамтын ажиллагааны асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь яамны үйл ажиллагааны стратегийн 6 дугаар зорилтын хүрээнд батлан хамгаалах гадаад хамтын ажиллагааны бодлогын хүрээнд гадаадын улс орнуудтай цэргийн итгэлцлийг бэхжүүлэх ажил, арга хэмжээг зохион байгуулах, зохицуулах үндсэн үүрэг хүлээнэ.
Энэ хүрээнд батлан хамгаалах гадаад хамтын ажиллагааны бодлогын хэрэгжилтийг хангахад дэмжлэг үзүүлэх, гадаад улсуудтай цэргийн итгэлцлийг бэхжүүлэх ажлыг зохицуулах, хамтын ажиллагаатай улс орон, олон улсын байгууллагатай олон улсын гэрээ, хэлэлцээр байгуулахад дэмжлэг үзүүлэх, цэргийн дипломатын албыг бэхжүүлэх, өргөжүүлэх, үйл ажиллагааг бодлогын удирдамжаар хангах чиг үүрэг хэрэгжүүлнэ.
Энэ нэгжийн үйл ажиллагаа нь батлан хамгаалахын гадаад хамтын ажиллагааг өргөжүүлэн, Монгол Улсын аюулгүй байдлыг улс төр-дипломатын аргаар хангахад дэмжлэг үзүүлэх, гадаад хамтын ажиллагааны эрх зүйн үндсийг бүрдүүлэх болон харилцаа, хамтын ажиллагаатай улс орнууд, олон улсын байгууллагуудтай харилцан ойлголцол, итгэлцлийг бэхжүүлэхэд дэмжлэг үзүүлэх, цэргийн дипломатын албыг бэхжүүлэх, батлан хамгаалах чадавхыг дээшлүүлэх, Зэвсэгт хүчний хөгжлийг эрчимжүүлэхэд чиглэсэн гадаад хамтын ажиллагааны бодлогыг хэрэгжүүлэх, харилцаа, хамтын ажиллагаатай улс орнуудтай олон улсын гэрээ, хэлэлцээр байгуулах, хэрэгжилтийг зохион байгуулах, Зэвсэгт хүчнийг энхийг дэмжих ажиллагаа, олон улсын сургалт, дадлагад оролцуулах бодлогын хэрэгжилтийг хангах, гадаад улс, олон улсад зохион байгуулагдаж байгаа арга хэмжээнд зочид, төлөөлөгч оролцуулах, цэргийн боловсон хүчнийг гадаад орнуудад сургаж, бэлтгэхэд дэмжлэг үзүүлэх зэрэгт чиглэгдэнэ. Энэ нь Монгол Улсын гадаад бодлогын үзэл баримтлал, Монгол Улсын батлан хамгаалах бодлогын үндэс баримт бичгийн хүрээнд гадаад хамтын ажиллагаа өргөжиж, цэргийн болон цэрэг-техникийн хамтын ажиллагааны цар хүрээ өсөж, энхийг дэмжих ажиллагаан дахь Зэвсэгт хүчний оролцоо, чадавх нэмэгдсэнээр тус тус хангагдана.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь Үндэсний аюулгүй байдлын зөвлөл, Гадаад харилцааны яам (Монгол Улсаас гадаад улсад суугаа Элчин сайдын яам, гадаад улсаас Монгол Улсад суугаа Элчин сайдын яам), бусад яам, Засгийн газрын тохируулагч, хэрэгжүүлэгч агентлаг, олон улсын байгууллагууд, эрдэм шинжилгээ, судалгаа, хэвлэл мэдээлэл, олон нийтийн байгууллага, иргэд байна.
Энэ үйлчилгээг үзүүлэхэд оролцох гол түнш нь Гадаад харилцааны яам, Хууль зүй, дотоод хэргийн яам, Сангийн яам, Элчин сайдын яамд, эрдэм шинжилгээ, судалгааны байгууллага байна.
7.Санхүү, хөрөнгө оруулалтын асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь үйл ажиллагааны стратегийн 7 дугаар зорилтын хүрээнд төсвийн ерөнхийлөн захирагчийн төсвийг төлөвлөх, батлагдсан төсөв, хөрөнгө оруулалтыг үр ашигтай удирдаж, гүйцэтгэлийг хангуулах, батлан хамгаалах төсөв, хөрөнгө оруулалтын бодлого болон салбарын нягтлан бодох бүртгэлийн бодлогыг тодорхойлж, санхүү, төсвийн нэгдсэн удирдлагаар хангах, үндсэн хөрөнгийн асуудлыг зохицуулах, салбарын худалдан авах ажиллагааг зохион байгуулах үндсэн үүрэг хүлээнэ.
Энэ хүрээнд батлан хамгаалах бодлого, зорилт, хууль тогтоомжийг хэрэгжүүлэхэд санхүү, төсвийн бодлого, үйл ажиллагаагаар дэмжлэг үзүүлэх, санхүү, нягтлан бодох бүртгэлийн бодлогыг тодорхойлж, салбарт хэрэгжүүлэх хөтөлбөр, төсөл, арга хэмжээний санхүүжилтийн хэрэгцээг тодорхойлж, төсвийн төсөл боловсруулах, сайдын эрхлэх асуудлын хүрээнд төсвийг үр ашигтай удирдах, гүйцэтгэлийг хангах, харьяа агентлаг, төсвийн байгууллагад санхүү, төсвийн бодлогоор дэмжлэг үзүүлэх, үйл ажиллагаанд нь хяналт тавих, төсвийн ерөнхийлөн захирагчийн эрхлэх асуудлын хүрээний хөрөнгө оруулалтын төсвийн төсөл, богино, дунд хугацаанд хэрэгжүүлэх хөрөнгө оруулалтыг төлөвлөж, гүйцэтгэлийг ханган ажиллах, “Зэвсэгт хүчний хөгжлийн сан”-ийн төсвийн төлөвлөлт, бодлого, үйл ажиллагааны зохион байгуулалтыг хангаж, сангийн хөрөнгийн бүрдүүлэлт, зарцуулалтад нягтлан бодох бүртгэлээр хяналт тавих чиг үүрэг хэрэгжүүлнэ.
Энэ нэгжийн үйл ажиллагаа нь төсвийн ерөнхийлөн захирагчийн эрхлэх асуудлын хүрээний хөрөнгө оруулалтын төсвийн төсөл, хөрөнгө оруулалтыг төлөвлөж, төсвийг үр ашигтай удирдах, гүйцэтгэлийг хангах, харьяа агентлаг, төсвийн байгууллагад санхүү, төсвийн бодлогоор дэмжлэг үзүүлэхэд чиглэгдэнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь бусад яам, Засгийн газрын тохируулагч, хэрэгжүүлэгч агентлаг, олон нийт, Төрлийн цэргийн командлал, зэвсэгт хүчний нэгтгэл, анги, байгууллага, төрийн өмчит үйлдвэр, аж ахуйн нэгж байна. Энэ үйлчилгээг үзүүлэхэд оролцох гол түнш нь Сангийн яам, бусад холбогдох яам, агентлаг байна.
8.Улсын нисэхийн асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь яамны үйл ажиллагааны стратегийн 8 дугаар зорилтын хүрээнд улсын нисэхийн үйл ажиллагаатай холбоотой хууль тогтоомж, бодлогын хэрэгжилтийг зохион байгуулах, улсын агаарын хөлгийг эзэмшигч байгууллагуудыг бодлогын нэгдсэн удирдлага, удирдамжаар хангах үндсэн үүрэг хүлээнэ.
Энэ хүрээнд улсын нисэхийн үйл ажиллагааны хэрэгжилтийг зохицуулахтай холбогдсон эрх зүйн баримт бичгүүдийг боловсруулахад мэргэжлийн дэмжлэг үзүүлэх, санал боловсруулах, улсын нисэхийн бодлогыг тодорхойлох, улсын агаарын хөлгийг эзэмшигч байгууллагуудын үйл ажиллагаанд мэргэжлийн хяналт тавих, бодлогын нэгдсэн, удирдлага, удирдамжаар хангах, агаарын орон зайг нисэхэд ашиглах, улсын агаарын хөлгөөр нислэг үйлдэх, нислэгийн аюулгүй ажиллагаа болон аюулгүй байдлыг хангах, улсын агаарын хөлгийг бүртгэх, гэрчилгээжүүлэх, нислэгт тэнцэх чадварын хадгалалт, техник үйлчилгээний ажлын чанар, гүйцэтгэл, баталгаажилтад хяналт тавих, улсын нисэхийн аэродром, тусгай тоноглолыг ашиглах бодлогыг тодорхойлох, хэрэгжүүлэх, улсын агаарын хөлгийг эзэмшигч байгууллагын нисэх баг, инженер, техникийн бүрэлдэхүүний мэргэжлийн эрхийг баталгаажуулах, сургалт зохион байгуулах, үнэмлэх, гэрчилгээ олгох арга хэмжээг хэрэгжүүлэх, хяналт тавих, мэргэжлийн дэмжлэг үзүүлэх чиг үүргийг хэрэгжүүлнэ.
Энэ нэгжийн үйл ажиллагаа нь батлан хамгаалах бодлогын хэрэгжилтийг зохион байгуулах, улсын нисэхийг хөгжүүлэх хөтөлбөр, төсөл, арга хэмжээний хэрэгжилтийг зохицуулах, нэгдсэн удирдамжаар хангаж, уялдаа холбоог зохицуулах, улсын нисэхийн бодлогын хэрэгжилтийг холбогдох яам, агентлаг, байгууллагад зохицуулах асуудлыг удирдан зохион байгуулах, хэрэгжилтийн явцын талаар удирдлагыг мэдээллээр хангах, шаардлагатай асуудлаар шийдвэр гаргуулах, төрийн цэргийн байгууллагын үйл ажиллагаанд хяналт тавих, түүний дагуу зөвлөмж гаргах, улсын агаарын хөлөг эзэмшигч байгууллагуудын хэмжээнд зөвхөн нисгэгч, инженер, техникийн бүрэлдэхүүний мэргэжлийн эрх, ур чадварыг баталгаажуулах, улсын агаарын хөлгийн хувьд улсын бүртгэлийн гэрчилгээ, нислэгт тэнцэх чадварын гэрчилгээ олгох, нислэгийн үйл ажиллагаанд хяналт тавих зэрэгт чиглэгдэнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь бусад яам, Засгийн газрын тохируулагч, хэрэгжүүлэгч агентлаг, төрийн цэргийн байгууллага, төрлийн цэргийн командлал, удирдах газар, Зэвсэгт хүчний нэгтгэл, анги, байгууллага, бусад хэрэглэгч байна. Энэ үйлчилгээг үзүүлэхэд оролцогч гол түнш нь Агаарын цэргийн командлал, Иргэний нисэхийн ерөнхий газар, холбогдох бусад яам, агентлаг байна.
9.Мэдээллийн технологийн асуудал хариуцсан зохион байгуулалтын бүтцийн нэгж, түүний үндсэн үүрэг, чиг үүрэг
Энэ нэгж нь үйл ажиллагааны стратегийн 9 дүгээр зорилтын хүрээнд батлан хамгаалах салбарын цахим бодлогыг тодорхойлж, цахимжилтийг хэрэгжүүлэх, харьяа байгууллагуудыг цахим нэгдсэн бодлогоор хангах, салбарын нэгдсэн мэдээллийн тогтолцоог бүрдүүлэх, статистик мэдээлэл гаргах, мэдээллийн сан бүрдүүлэх, цахим үйлчилгээг боловсронгуй болгох, орчин үеийн зэвсэг техник ашиглах, үйлдвэрлэлийг хөгжүүлэх зорилгоор цахимжилт, мэдээллийн технологийг хөгжүүлэх үндсэн чиг үүрэг хүлээнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, яамны Төрийн нарийн бичгийн дарга, зохион байгуулалтын бүтцийн бусад нэгжүүд байх бөгөөд шууд бус хэрэглэгч нь бусад яам, Засгийн газрын тохируулагч, хэрэгжүүлэгч агентлаг, төрлийн цэргийн командлал, удирдах газар, Зэвсэгт хүчний нэгтгэл, анги, салбарууд, нутгийн захиргааны байгууллага, төрийн болон төрийн бус байгууллага, аж ахуй нэгж, албан тушаалтан, иргэд байна.
Энэ үйлчилгээг үзүүлэхэд оролцох гол түнш нь Монгол Улсын Ерөнхийлөгчийн Тамгын газар, Засгийн газрын Хэрэг эрхлэх газар, Цахим хөгжил, инновац, харилцаа холбооны яам, төрийн захиргааны төв болон нутгийн захиргааны байгууллага, агентлагууд, аймаг, нийслэл (дүүрэг)-ийн Засаг дарга, тэдгээрийн Тамгын газар байна.
10.Батлан хамгаалахын ерөнхий хянан шалгагчийн ажлын нэгж, түүний үндсэн үүрэг, чиг үүрэг
Энэ нэгж нь үйл ажиллагааны стратегийн 10 дугаар зорилтын хүрээнд батлан хамгаалахын хяналт шалгалт, үнэлгээний бодлого, чиглэлийг тодорхойлж, батлан хамгаалахын болон зэвсэгт хүчний хяналт шалгалт, үнэлгээ, дотоод аудитын нэгжийг нэгдсэн удирдамжаар хангаж, ажлын уялдаа холбоог зохицуулах, салбар, төрийн цэргийн байгууллагын үйл ажиллагаанд хяналт-шинжилгээ, үнэлгээ хийх, түүний дагуу зөвлөмж гаргах, хэрэглэгчдийг мэдээллээр хангах үндсэн үүрэг хүлээнэ.
Энэ хүрээнд батлан хамгаалах бодлого, хууль тогтоомж, хөгжлийн стратеги, хөтөлбөр, төслийн хэрэгжилтийн талаар төрийн захиргааны болон нутгийн захиргааны байгууллага, төрийн цэргийн байгууллагын хүрээнд хяналт-шинжилгээ, үнэлгээ хийх, батлан хамгаалахын төрийн өмч, зэвсэг, техник, тусламжийн хөрөнгийн ашиглалт, хадгалалтын байдалд хяналт шалгалт хийх, төсвийн ерөнхийлөн захирагчийн эрхлэх асуудлын хүрээний төсөв, санхүүгийн төлөвлөлт, гүйцэтгэлд хяналт-шинжилгээ, үнэлгээ хийх, хяналт-шинжилгээ, үнэлгээний үр дүнгээр зөвлөмж гаргах, хяналт тавих чиг үүрэг хэрэгжүүлнэ.
Энэ нэгжийн үйл ажиллагаа нь батлан хамгаалах бодлого, хууль тогтоомж, сайдын бодлого, шийдвэрийн хэрэгжилтийн үр дүнг дээшлүүлэх, салбар, Зэвсэгт хүчний үйл ажиллагааны үр ашгийг нэмэгдүүлэх, алба хаагчдын сахилга, хариуцлагыг дээшлүүлэхэд дэмжлэг үзүүлэхэд чиглэгдэнэ.
Тус нэгжээс үзүүлэх үйлчилгээний үндсэн хэрэглэгч нь сайд, дэд сайд, Засгийн газрын холбогдох агентлаг байх бөгөөд шууд бус хэрэглэгч нь төрийн цэргийн байгууллага, төрлийн цэргийн командлал, удирдах газар, Зэвсэгт хүчний нэгтгэл, анги, байгууллага, бусад хэрэглэгч байна. Энэ үйлчилгээг үзүүлэхэд оролцогч гол түнш нь Аудитын байгууллага байна.